Шла сула да ўздоўж села…
28 лютага ў апошні каляндарны дзень зімы ў выставачнай зале ГДУ імя Францыска Скарыны ў рамках экспазіцыі “Маркаўскаму роду няма пераводу” адбылося цікавае мерапрыемства, прысвечанае абраду ваджэння сулы. Нагадаем, што гэту персанальную выставу падрыхтавалі брат і сястра Віктар і Вольга Шыпковы. Вольга — студэнтка трэцяга курса факультэта псіхалогіі і педагогікі ГДУ імя Ф. Скарыны, якая разам з братам на працягу дзесяці гадоў шукала і збірала каштоўныя экспанаты.
Сярод запрошаных гасцей былі загадчык кафедры беларускай культуры і фалькларыстыкі Валянціна Станіславаўна Новак і загадчык філіяла Веткаўскага музея стараабрадніцтва і беларускіх традыцый імя Ф.Р. Шклярава Пятро Міхайлавіч Цалка. Студэнты з цікавасцю слухалі іх паведамленні аб сутнасці рытуалаў, звязаных з абрадам ваджэння сулы, семантыцы ваджэння карагода вакол дзетак, якія павінны былі знаходзіцца ў цэнтры і якіх падкідвалі ўгору, што сімвалізавала ў мясцовай традыцыі ўраджайнасць і дабрабыт. Лакальную спецыфіку гэтага ўнікальнага абраду, які рыхтуецца для ўнясення ў Спіс гісторыка-культурных каштоўнасцей Беларусі, раскрыў Віктар Уладзіміравіч Шыпкоў, адзін з арганізатараў выставы.
Яніна Гулевіч
лабарант кафедры
беларускай культуры і
фалькларыстыкі
Да Міжнароднага Дня роднай мовы
21 лютага 2018г. выкладчыкі кафедры беларускай культуры і фалькларыстыкі Вяргеенка Святлана Анатольеўна і Панкова Наталля Міхайлаўна арганізавалі і правялі брэйн-рынг “Перакладчык”, прысвечаны Міжнароднаму Дню роднай мовы. У брэйн-рынгу прынялі ўдзел студэнты –эканамісты 1-га і 2-га курсаў (спецыяльнасці “Дзяржаўнае кіраванне”, “Эканоміка і кіраванне”). Першы этап уключаў праверку каманд на веданне перакладу беларускіх слоў. Другая частка мерапрыемства ўяўляла сабой папулярную сярод моладзі гульню “Кракадзіл”. Прадстаўнікам каманд прапаноўвалася пры дапамозе пантамімы растлумачыць значэнне беларускіх слоў і каманды павінны былі адгадаць і назваць гэтае слова. Час прайшоў хутка і весела, усе ўдзельнікі брэйн-рынга атрымалі задавальненне ад мерапрыемства.
Выкладчыкі ГДУ імя Францыска Скарыны ў эфіры “Добры вечар, Гомель”
19 лютага 2018 года загадчык кафедры беларускай культуры і фалькларыстыкі філалагічнага факультэта, д.ф.н., прафесар Валянціна Станіславаўна Новак разам з намеснікам дэкана па інфарматызацыі факультэта псіхалогіі і педагогікі, старшым выкладчыкам кафедры псіхалогіі Сцяпанам Аляксандравічам Станібулам пабывалі ў якасцей гасцей на тэлеперадачы “Добры вечар, Гомель”, прысвечанай Масленічнаму тыдню і Даравальнай нядзелі.
Выкладчыкі пазнаёмілі гледачоў з асноўнымі рытуаламі масленічнай абраднасці, сімволікай прадметнай атрыбутыкі гэтага свята і яго паходжаннем. Не абышлі ўвагай і псіхалагічны аспект Даравальнай нядзелі.
Яніна Гулевіч
Нашы госці
16 лютага на філалагічны факультэт завіталі вучні 7-ых класаў ДУА “Гімназія №14г. Гомеля”.
Загадчык кафедры беларускай літаратуры прафесар І.Ф. Штэйнер правёў для іх экскурсію па літаратурным музеі “Альма матар”, расказаў пра пісьменнікаў, журналістаў, бардаў, тэлевядучых, якія вучыліся на філалагічным факультэце нашай установы.
Загадчык кафедры рускага, агульнага і славянскага мовазнаўства прафесар У.І. Коваль гасцінна сустрэў гімназістаў у аўдыторыі 2-23, дзе праходзяць заняткі па кітайскай мове і культуры. Вучні пазнаёміліся са студэнтамі з Шанхайскага інстытута індустрыі, камерцыі і замежных моў, якія прыехалі вывучаць рускую філалогію, павіншавалі іх з Новым годам па кітайскім календары і на кітайскай мове.
А завяршылася экскурсія ў Скарынаўскім кабінеце, дзе дэкан факультэта А.М. Палуян расказала пра спецыяльнасці факультэта, уступныя іспыты, магчымасці будучага працаўладкавання.