Вандроўкі па Полацку

Дзень беларускага пісьменства ў 2017 годзе будзе адзначацца ў славутым Полацку, што, дарэчы, даволі сімвалічна: менавіта тут нарадзіўся Францыск Скарына, славуты асветнік і  першадрукар, дзякуючы якому беларусы ўжо 500 год маюць кнігадрукаванне. Напярэдадні ўрачыстых святкаванняў адзін з прыгажэйшых гарадоў Беларусі наведалі студэнты-філолагі гр. БФ-11 разам з выкладчыкамі кафедры беларускай культуры і фалькларыстыкі Новак В.С. і Кастрыцай А.А. Падчас свайго невялікага падарожжа яны ўбачылі Чырвоны мост праз раку Палата і Барысаў камень, помнікі Францыску Скарыну, Ефрасінні Полацкай, Усяславу Чарадзею і нават літары “Ў”, завіталі ў гасцінны дворык Полацкага дзяржаўнага ўніверсітэта, наведалі Музей беларускага кнігадрукавання.