Гістарычна недакладная трагікамедыя

31 кастрычніка студэнты юрыдычнага, філалагічнага і гістарычнага факультэтаў Гомельскага дзяржаўнага ўніверсітэта імя Францыска Скарыны ўбачылі   спектакль “Кар’ера доктрара Рауса”, пастаўлены Рэспубліканскім тэатрам беларускай драматургіі па п’есе сучаснага беларускага пісьменніка  Віктара Марцінавіча.  П’еса стала адным з пераможцаў конкурса “Францыск Скарына і сучаснасць”  у 2016г.

“Кар’ера доктара Рауса” – гісторыя чалавека, які нарадзіўся раней сваёй эпохі. Спектакль расказвае пра пакуты Скарыны ў справе кнігадрукавання, яго падарожжы па Польшчы, Чэхіі, Германіі, Расіі. Адусюль доктара медыцыны выганяюць, бачаць у ім вар’ята або агента. А ён, даверлівы і наіўны ідэаліст, працягвае верыць людзям.

Скарына – чалавек, які належыць свету, а не якой-небудзь асобнай краіне ці этнасу. Скарына – творчая асоба, галоўны вораг якога – “файны хлопчык у галіфэ”, якому замінаюць творчыя памкненні, вандроўны лад жыцця і сам факт існавання мастака. 

Выдатная акцёрская ігра, мноства алюзій на падзеі сучаснага жыцця, цудоўная беларуская мова, класічная музыка Моцарта, Вагнера, Брамса – усё гэта захапіла гледачоў, нягледзячы на тое, што спектакль ішоў тры гадзіны. 

А. Палуян, дэкан філалагічнага факультэта