Міжнародная навуковая канферэнцыя

22 лістапада 2019 года на філалагічным факультэце ГДУ імя Ф. Скарыны прайшла МІЖНАРОДНАЯ НАВУКОВАЯ КАНФЕРЭНЦЫЯ "Святло Скарынавых iдэй", прысвечаная 95-годдзю з дня нараджэння прафесара У.В. Анічэнкі.

Навуковы форум быў арганізаваны кафедрай беларускай мовы Гомельскага дзяржаўнага ўніверсітэт імя Францыска Скарыны.

 

У канферэнцыі прынялі ўдзел вядомыя мовазнаўцы, літаратуразнаўцы, фалькларысты і мастацтвазнаўцы і маладыя навукоўцы - студэнты, магістранты, аспіранты, якія толькі пачынаюць свой шлях у навуку.

Пленарнае пасяджэнне адкрыла дэкан філалагічнага факультэта ўстановы адукацыі “Гомельскі дзяржаўны ўніверсітэт імя Францыска Скарыны” к. філал. н., дацэнт Палуян Алена Мікалаеўна, якая прывітала ўдзельнікаў навуковай сустрэчы і пажадала плённай навуковай працы.

Загадчык кафедры беларускай мовы ўстановы адукацыі “Гомельскі дзяржаўны ўніверсітэт імя Францыска Скарыны” к. філал. н., дацэнт Воінава Алена Мікалаеўна распавяла прысутным пра гісторыю канферэнцыю, пра значэнне асобы Ф. Скарыны ў беларускай культуры.

Канферэнцыя "Святло Скарынавых ідэй" стала традыцыйнай на філалагічным факультэце. У гэтым годзе канферэнцыя была прысвечана 95-годдзю доктара філалагічных навук прафесара Уладзіміра Васільевіча Анічэнкі, вядомага даследчыка гісторыі ўсходнеславянскіх моў, славіста міжнароднага ўзроўню, аднаго з пачынальнікаў беларускай скарыніяны і аднаго з ініцыятараў прысваення нашай вну ганаровага імя беларускага першадрукара Францыска Скарыны.

Пра незвычайны лёс і навуковую дзейнасць Уладзіміра Васільевіча нагадала ўдзельнікам канферэнцыі Аляксандра Аляксандраўна Станкевіч, д.філал.н., прафесар кафедры беларускай мовы ўстановы адукацыі “Гомельскі дзяржаўны ўніверсітэт імя Францыска Скарыны”.

Вячаслаў Канстанцінавіч Шчэрбін, к.філал.н., загадчык сектара Цэнтра сістэмнага аналізу і стратэгічных даследаванняў Нацыянальнай акадэміі навук Беларусі (г. Мінск, Беларусь), прысвяціў свой даклад беларускай мовазнаўчай энцыклапедыстыцы.

Вольга Аляксееўна Ляшчынская, д.філал.н., прафесар кафедры беларускай мовы ўстановы адукацыі “Гомельскі дзяржаўны ўніверсітэт імя Францыска Скарыны” расказала пра семантычныя адрозненні агульных кампаратыўных фразеалагізмаў беларускай і рускай моў.

Уладзімір Іванавіч Коваль, д.філал.н., прафесар кафедры рускага, агульнага і славянскага мовазнаўства ўстановы адукацыі “Гомельскі дзяржаўны ўніверсітэт імя Францыска Скарыны” у сваім дакладзе правёў супастаўляльнае даследаванне міфалагічных вобразаў рускага Змея Гарыныча, беларускага Цмока і кітайскага дракона  (龙 lóng).

Госці з Украіны Святлана Іванаўна Бондар, кандыдат псіхалагічных навук, дацэнт (Акадэмія працы, сацыяльных адносін і турызму, г. Кіеў, Украіна) і Алена Рыгораўна Малінка, ст. выкладчык Кіеўскага нацыянальнага эканамічнага ўніверсітэта імя В. Гетьмана (г. Кіеў, Украіна) прапанавалі даклад "Коммуникативная природа текста иностранного языка".

Ірына Анатольеўна Крыцкая, ст. выкладчык Таўрычаскага нацыянальнага ўніверсітэта імя У.І.Вярнадскага (г. Кіеў, Украіна) гаварыла пра навучанне іншамоўным зносінам сродкамі крос-культурнага дыялогу.

Аляксей Васільевіч Солахаў, к.філал.н., дацэнт, дацэнт кафедры спецыяльнай педагогікі і методык дашкольнай і пачатковай адукацыі Мазырскага дзяржаўнага педагагічнага ўніверсітэт імя І. П. Шамякіна (г. Мазыр, Беларусь) распавёў пра інтралінгвістычныя фактары ўтварэння  індывідуальна-аўтарскіх неалагізмаў.

Алена Львоўна Батурына, аспірант ГДУ імя Францыска Скарыны гаварыла пра рэцэпцыю нямецкай літаратуры і станаўленне рамантычнай плыні ў польскамоўнай літаратуры Беларусі першай паловы ХІХ стагоддзя.