ЖЫВАЯ ТРАДЫЦЫЯ ПРОДКАЎ (У “Юраўскім карагодзе” – выкладчыкі і студэнты ГДУ імя Ф.Скарыны)

   Маляўнічая  працэсія з іконай наперадзе, караваем з запаленай свечкай, упрыгожаным майскай зелянінай і кветкамі, з граблямі з зялёным фартухом рухалася па вуліцы на ўскраіну вёскі, да жытнёвага поля. Да мясцовых жыхароў, апранутых па-святочнаму, у беларускім нацыянальным адзенні далучыліся шматлікія госці, якія прыехалі 6 мая, у дзень Святога Георгія Пабеданосца, у вёску Пагост Жыткавіцкага раёна, каб стаць сведкамі абраду ”Юраўскі карагод”.

   Унікальны абрад праводзіцца тут на працягу трох дзесяцігоддзяў, дзякуючы  народнаму фальклорна-этнаграфічнаму калектыву “Міжрэчча”, яго стваральніку і кіраўніку, захавальніку мясцовых традыцый, спявачцы і майстру народных рамёстваў Кацярыне Аляксееўне Панчэня.  Ад яе хаты, якая нагадвае сапраўдны этнаграфічны музей, з вытканымі і вышытымі яе рукамі посцілкамі  і ручнікамі, дзе спяклі  і ўпрыгожылі абрадавы хлеб –“карагод”, і пачалося ўрачыстае шэсце на поле. Тут вяскоўцы вадзілі   карагод, спявалі  і прасілі, каб у гэтым годзе быў добры ўраджай: “Радзі, божа, жыта на новае лета”, каб усе былі здаровымі  і шчаслівымі.

   Хмарнае неба і дробны дожджык  не сапсавалі  прыўзнятага настрою ні самім удзельнікам абрадавага дзеяння,  ні яго відавочцам. Свята потым  перамясцілася  да Пагосцкага клуба-бібліятэкі, дзе мясцовыя самадзейныя артысты танчылі,  пад гармонік выконвалі народныя песні, якія спявалі яшчэ іх бабулі і прабабулі, вадзілі  карагод і  запрашалі  стаць у яго ўсіх жадаючых.  А на развітанне гасцей пачаставалі  смачнымі стравамі, надзялілі кожнага кавалкам абрадавага каравая.

   Жывую традыцыю продкаў, якой у 2004 годзе, першай у Рэспубліцы Беларусь, прысвоены статус нематэрыяльнай гісторыка-культурнай каштоўнасці, цікава было ўбачыць  выкладчыкам і студэнтам  ГДУ імя Ф.Скарыны. Паездку на жыткавіцкую зямлю, дзе шануюць  свае абрады і традыцыі, для іх, а таксама навучэнцаў і педагогаў каледжа мастацтваў імя Н.Ф.Сакалоўскага, наладзіў Расійскі цэнтр навукі і культуры ў Гомелі. Вялікую арганізацыйную работу правёў дацэнт кафедры рускага, агульнага і славянскага мовазнаўства Арцём Леанідавіч Стрыжак, за што яму вялікі дзякуй.

   Выдатны настрой, атрыманы ў в. Пагост, дапоўнілі не менш прыемныя ўражанні ад экскурсіі ў г.Тураў, дзе можна было  пабачыць славутыя каменныя крыжы, аб якіх вядома далёка за межамі Беларусі.

Тамара ДУБЯК

Фота Алены КАСТРЫЦЫ, Валянціны НОВАК